چیئرمین پنجاب ہائر ایجوکیشن کمیشن پروفیسر ڈاکٹر شاہد منیر نے کہا ہے کہ تعلیم کے لیے کم بجٹ تحقیقی کام کی راہ میں رکاوٹ ہے

لاہور (جنرل رپورٹر) چیئرمین پنجاب ہائر ایجوکیشن کمیشن پروفیسر ڈاکٹر شاہد منیر نے کہا ہے کہ تعلیم کے لیے کم بجٹ تحقیقی کام کی راہ میں رکاوٹ ہے ۔وہ تعلیمی ورفاہی تنظیم عمل اکیڈمی کی تقریب سے خطاب کررہے تھے ۔ تقریب میں اخوت فاونڈیشن کے ڈائریکٹر امجد ثاقب گورنمنٹ کالج یونیورسٹی کے وائس چانسلر ڈاکٹر اصغرزیدی ،وائس چانسلر یونیورسٹی یجوکیشن ڈاکٹر طلعت نصیر پاشا ودیگر ماہرین تعلیم نے بھی خطاب کیا ۔ڈاکٹر شاہد منیر نے کہا کہ یونیورسٹیوں کو ملنے والی زیادہ تر گرانٹس تنخواہوں کی مد میں جاتی ہیں اور تحقیقی کام کے لیے خاطر خواہ فنڈز دستیاب نہیں ہیں۔ انہوں نے اعتراف کیا کہ انڈسٹری اور اکیڈمی لنکیج کے درمیان روابط کا فقدان ہے جسے دور کرنے کی ضرورت ہے، اس سلسلے میں نصاب کی تیاری اہم کردار ادا کرسکتی ہے۔ انہوں نے کہا کہ ایسا نصاب ہونا چاہیے جو انڈسٹری کی ضروریات سے ہم آہنگ ہو۔ ملک کو درپیش مسائل سے نمٹنے کیلئے طلباء میں انٹرنپنیورشپ کے رجحان کو فروغ دینا ہوگا۔اپنے خطاب میں ڈاکٹرشاہد منیر نے کہا کہ ملک کو اس وقت ماحولیات، بڑھتی آبادی اور معیشت سمیت کئی چیلنجز کا سامنا ہے جس کیلئے تعلیمی اداروں میں مارکیٹ کی ضروریات کے مطابق افرادی قوت کی پیداوار ضروری ہے۔ اپنے خطاب میں ڈاکٹر شاہد منیر نے کہا کہ جنوبی ایشیاء میں شامل ممالک کو چار طرح کے مسائل درپیش ہیں جن میں آبادی کا پھیلاؤ، موسمیاتی تبدیلیاں، تنازعات اور بے روزگاری شامل ہیں۔ انہوں نے کہا کہ خطے میں اتنے وسائل نہیں جتنی تیزی سے آبادی میں اضافہ ہورہا ہے۔انہوں نے کہا کہ آبادی میں اضافہ نہ صرف معاشی عدم استحکام کا سبب بنتا ہے بلکہ تعلیمی نظام کو بھی متاثر کرتا ہے۔ انہوں نے کہا کہ ایک تخمینہ کے مطابق 2050میں دنیا کی آبادی 10بلین ہو جائے گی جسے کنٹرول کرنے کیلئے اقدامات کرنا ہوں گے۔ اکیسویں صدی کے تقاضوں اور مارکیٹ کی ضروریات کے مطابق گرایجوئیٹس کو سکالر شپس کی فراہمی عمل اکیڈمی کا خوش آئنداقدام ہے ۔